மாதவத்தின் குறிப்பிடத்தக்க அம்சங்களில் ஒன்றாக, அது பல தன்னார்வத் தொண்டர்கள் மனவிருப்போடு பணிசெய்யும் களமாக அமைந்திருப்பத்தினைச் சொல்லலாம். மாதவத்தின் சேவைகளை நிலைநிறுத்துவதிலும், அவற்றை விரிவுபடுத்துவதிலும் தன்னார்வலர்கள் முக்கிய பங்காற்றியிருக்கின்றார்கள். தன்னார்வப் பணியாளர்களால் வழங்கப்பட்ட தன்னலமற்ற அர்ப்பணிப்புகளும், அவர்களது அபரிதமான ஆர்வமும் உற்சாகமும் போன்றவை மாதவத்தின் சேவை வழங்கல்களைக் கணிசமானளவு வலுப்படுத்தியிருக்கின்றது. அத்துடன் மாதவத்தின் பிள்ளைகள் மற்றும் அவர்களின் குடும்பங்களுக்குத் தேவைப்பட்ட ஆதரவுகளை வழங்குவதிலும் தன்னார்வத் தொண்டர்கள் பெரும் பங்காற்றினார்கள்.
மாதவம் ஆரம்பமான காலத்திலிருந்தே, நிலையத்தில் பணியாற்றும் பணியாளர்களின் பற்றாக்குறை என்பது ஒரு மிகப்பெரிய சவாலாக இருந்து வந்தது. ஆனால் மாதவத்தில் காலத்துக்குக் காலம் இணைந்து கொண்ட தன்னார்வப் பணியாளர்களின் சேவை மனப்பான்மையும், உறுதியான அர்ப்பணிப்பும் அந்த இடைவெளியைக் குறைப்பதில் மிகவும் உதவியது. பல்கலைக்கழக வாழ்க்கையிலிருந்த ஒரு சில மருத்துவ மாணவர்கள் பல வருடங்களாகத் தங்கள் நேரத்தையும், திறமைகளையும் மாதவத்தின் முயற்சிகளையும் செயல்பாடுகளையும் மேம்படுத்துவதற்கான தமது ஆதரவுகளை வழங்கினார்கள். மருத்துவ மாணவர்களுடன் சேர்ந்து பிற துறைகளில் இருந்து வந்த தன்னார்வப் பணியாளர்களும் மாதவத்துடன் இணைந்து தங்கள் சேவைகளை வழங்கி உதவினர்.
தன்னார்வப் பணியாளர்களின் முக்கிய பங்களிப்புகளில் ஒன்றாக, அவர்கள் சிகிச்சை அமர்வுகளில் உதவுவது அமைந்திருக்கின்றது. இந்த நிலைமை துறைசார்ந்த நிபுணத்துவத்துடன் சிகிச்சை அளிப்பவர்களின் பணியை இலகுவாக்குவதோடு மட்டுமல்லாமல், குழந்தைகளுக்கும் பெற்றோருக்கும் சாதகமானதொரு புறச்சூழலையும் உருவாக்கியது. மேலும், தன்னார்வப் பணியாளர்கள் ஒட்டிசம் தொடர்பான விழிப்புணர்வுகளைப் பரப்புவதிலும், மாதவத்தின் செயல்பாடுகளை வெளி உலகிற்குத் தெரியப்படுத்துவதிலும் மிக முனைப்பாகச் செயல்பட்டுள்ளனர்.
இவற்றோடு, தன்னார்வப் பணியாளர்கள் தமது பிள்ளைகளின் நிலையைப் புரிந்து கொள்வதிலும், அவர்களைப் பராமரிப்பதிலும் பற்பல சிரமங்களை எதிர்கொள்கின்ற பெற்றோர்களுக்கு மூளை மற்றும் நரம்பியல்சார் விருத்திக் குறைபாடுகளைப் பற்றிய விழிப்புணர்வை ஏற்படுத்துவதிலும் ஆர்வத்தோடு ஈடுபட்டனர். அந்தத் தன்னார்வப் பணியாளர்கள் மாதவத்தில் சிகிச்சை மற்றும் இடையீடுகளை வழங்குவதில் மட்டும் தங்களை மட்டுப்படுத்திக் கொள்ளாமல், ஏனைய தொழில்நுட்ப மற்றும் நிர்வாகத் துறைகளிலும் தங்களது பங்களிப்பை வழங்கினர். சிகிச்சை தொடர்பான விடயங்களைப் பதிவு செய்தல், ஆவணங்களைப் பராமரித்தல், புகைப்படங்கள் எடுப்பது, வீடியோ பதிவுகளை உருவாக்குவது போன்ற பணிகளிலும் அவர்கள் ஈடுபட்டனர்.
மாதவத்தில் மேற்கொள்ளப்படுகின்ற தன்னார்வப்பணி என்பது வெறும் பணியாளர் பற்றாக்குறையை நிவர்த்தி செய்தல் என்பதனையும் தாண்டி, அது தற்போது மாதவத்தின் ஓர் அடையாள அம்சமாக மாறியுள்ளது. இவ்வாறான தன்னலமற்ற சேவைகளை வழங்குவது என்பது சமூகப் பொறுப்புணர்வை வளர்க்கின்ற ஒரு செயல்பாடாக இருக்கின்றது. மாதவம் அதற்கான ஒரு களத்தை வழங்குகின்றது.
இவ்வாறு, மாதவத்தில் தன்னார்வப்பணிகள் தொடர்ந்து நடைபெற்று வருகின்ற போதிலும், அங்கு மேலும் அதிகமானவர்கள் தன்னார்வப் பணிகளில் ஈடுபடும் செல்நெறியை ஊக்குவிக்க வேண்டியது மிக அவசியமானதொரு விடயமாகும். மாதவத்தில் புதிய நோக்கங்கள், புதுமையான யோசனைகள், மற்றும் புத்துணர்ச்சியுடன் கூடிய தன்னார்வப் பணியாளர்கள் செயல்படுவது, அந்நிலையத்தின் சேவைகளை மேம்படுத்துவதற்கு பெரிதும் உதவுகின்றது.
மாதவம் ஒரு வலுவான தன்னார்வப்பணியாளர்களின் வலையமைப்பைப் பேணி வளர்ப்பதன் மூலம், மூளை மற்றும் நரம்பு வளர்ச்சியுடன் தொடர்புடைய கோளாறுகளுடைய பிள்ளைகளுக்கான முழுமையான பராமரிப்பினைத் தொடர்ச்சியாக வழங்கக் கூடியதாயிருக்கும். உண்மையில், தன்னார்வப் பணிசெய்தலின் பயன் என்பது சேவை வழங்குதல் என்ற உடனடி விளைவுக்கு அப்பாற்பட்டது. அது ஒருவரில் ஒத்துணர்வு, கூட்டுணர்வு, பொறுப்புகளைப் பகிர்ந்து கொள்ளல் போன்ற பல நற்பண்புகளைப் பேணி வளர்க்கின்றது.
எதிர்காலத்திலும் மாதவம் தனது தொலைநோக்குகளான உட்படுத்தல், பராமரிப்பு, மற்றும் வலுவூட்டல் என்பவற்றோடு ஒத்துப்போகின்ற தன்னார்வப் பணியாளர்களை வரவேற்பதில் மிக உறுதியாகவும், அர்ப்பணிப்போடும் இருக்கின்றது.
நடமாடக்கோயில் நம்பர்க்கு ஒன்று ஈயில், படமாடக்கோயில் பகவர்க்கு அது ஆமே!
